اقراء علمی مرکز چمن میں یومِ اقبال کی تقریب، سید سردار محمد خوندئی کا نوجوانوں کو خودی اور بلند عزائم کا پیغام
چمن (خصوصی رپورٹ): ملک کے معروف تعلیمی ادارے اقراء علمی مرکز چمن میں یومِ علامہ اقبال کے موقع پر ’’علامہ اقبال اور دورِ حاضر کے نوجوانوں کا روشن مستقبل‘‘ کے عنوان سے ایک پروقار تقریب کا انعقاد کیا گیا۔
تقریب کے مہمانِ خصوصی سینئر صحافی، کالم نگار اور اقراء علمی مرکز چمن کے بانی سید سردار محمد خوندئی تھے، جنہوں نے اپنے خطاب میں علامہ اقبال کے افکار و پیغام کی اہمیت اور نوجوان نسل کی ذمہ داریوں پر روشنی ڈالی۔
سید سردار محمد خوندئی نے کہا کہ علامہ اقبال کا پیغام آج بھی نوجوانوں کے لیے مشعلِ راہ ہے۔ اقبال نے نوجوانوں کو شاہین سے تشبیہ دی، جو بلند پروازی، خودداری، خود اعتمادی اور عمل کی علامت ہے۔ انہوں نے طلبہ پر زور دیا کہ وہ تعلیم کے ساتھ کردار سازی، نظم و ضبط اور حب الوطنی کو بھی اپنی زندگی کا حصہ بنائیں، کیونکہ قوم کا روشن مستقبل نوجوان نسل کے ہاتھوں میں ہے۔
اقبال کا فلسفۂ خودی نوجوانوں کے لیے مشعلِ راہ
اپنے خطاب میں انہوں نے کہا کہ علامہ اقبال محض ایک شاعر نہیں بلکہ ایک مکمل فکر، تحریک اور روشن مستقبل کا پیغام ہیں۔ جب اقبال نے امتِ مسلمہ کو غلامی، مایوسی اور انتشار کی کیفیت میں دیکھا تو انہوں نے نوجوانوں کو فلسفۂ خودی کا درس دے کر بیداری، خود اعتمادی اور بلند مقصد کی طرف متوجہ کیا۔
انہوں نے کہا کہ موجودہ دور کے چیلنجز بھی کم اہم نہیں۔ آج کا نوجوان موبائل فون، سوشل میڈیا اور مایوسی کے حصار میں گھرا ہوا ہے۔ ایسے حالات میں ضرورت اس امر کی ہے کہ نوجوان اقبال کے شاہین کی طرح بلند پروازی کا جذبہ پیدا کریں، اپنی منزل خود متعین کریں اور محنت، دیانت داری اور اچھے کردار کو اپنی پہچان بنائیں۔
طلبہ کو تعلیم، اخلاق اور حب الوطنی اپنانے کی تلقین
سید سردار محمد خوندئی نے کہا کہ طلبہ ہی ملک کا اصل سرمایہ ہیں۔ اگر نوجوان علم کو اپنا ہتھیار، اخلاق کو اپنا زیور اور حب الوطنی کو اپنا ایمان بنا لیں تو قوم کی ترقی کی راہ میں کوئی رکاوٹ حائل نہیں ہو سکتی۔
انہوں نے طلبہ کو نصیحت کی کہ وہ اپنے اساتذہ اور والدین کا احترام کریں، وقت کی پابندی کریں، کتابوں سے دوستی رکھیں اور محدود خوابوں کے بجائے بلند مقاصد کا تعین کریں۔
تقریب سے امان اللہ، شادمن اور احسان اللہ نے بھی خطاب کیا اور علامہ اقبال کی تعلیمات اور نوجوان نسل کی فکری و اخلاقی تربیت کی اہمیت کو اجاگر کیا۔
تقریب کے اختتام پر سید سردار محمد خوندئی نے اقراء علمی مرکز چمن کے دونوں اداروں کے اساتذہ، منتظمین اور طلبہ کو کامیاب اور بامقصد تقریب کے انعقاد پر مبارک باد پیش کی۔
